Azərbaycan Qida Təhlükəsizliyi İnstitutunun (AQTİ) mütəxəssisləri  “Azerbaijan Coca-Cola Bottlers” MMC-nin qida təhlükəsizliyi sahəsində fəaliyyət göstərən əməkdaşlarına təlim keçib. 

“Qida sahəsində gigiyena tələbləri” mövzusunda təşkil olunan təlimin əsas məqsədi iştirakçılara müəssisələrin fəaliyyətinin qanunvericiliyin və sanitariya-gigiyena qaydalarının tələbləri çərçivəsində təşkil edilməsi üçün zəruri məlumatlar verməkdir. 

Təlim iştirakçılarına qanunvericiliyin tələblərinə uyğun olaraq, müəssisələrdə qida məhsullarının qəbulu, emalı, saxlanması, daşınması zamanı gigiyena qaydalarının tətbiqi, eləcə də təhlükəli amillər, çirklənmə növləri izah olunub.İnteraktiv formada təşkil edilən təlimin sonunda müzakirələr aparılıb və iştirakçıların mövzu ilə bağlı bilik səviyyəsi qiymətləndirilib.

Xatırlatmaq istərdik ki, keçirilən gigiyenik təlimlər “Qida təhlükəsizliyi haqqında” Azərbaycan Respublikasının Qanununun 22.1-ci maddəsinin tələblərinə uyğun şəkildə təşkil olunur və bütün qida subyektlərinin işçi heyətinin gigiyenik təlimlərdə iştirakı məcburidir. 

Qeyd edək ki, AQTİ tərəfindən “Qida sahəsində gigiyena tələbləri” və digər mövzularda keçirilən təlimlərdə iştirak etmək istəyən sahibkarlıq subyektləri "1003 – Çağrı Mərkəzi"nə zəng edə bilərlər.