Azərbaycan Qida Təhlükəsizliyi İnstitutu (AQTİ) tərəfindən qida təhlükəsizliyi sahəsi ilə bağlı olan sahibkarlıq subyektlərinin fəaliyyətinin mövcud qanunvericiliyin və beynəlxalq standartların tələblərinə uyğun təşkili məqsədilə keçirilən təlimlər davam etdirilir.

Növbəti nəzəri-praktiki təlim AQTİ mütəxəssisləri tərəfindən “Veysəloğlu” Məhdud Məsuliyyətli Cəmiyyətin əməkdaşları üçün “Saxlanma və daşınma proseslərində qida təhlükəsizliyinin təmin olunması” mövzusunda keçirilib.

Təlimdə iştirakçılar qida zəncirinin mərhələləri, qida obyektləri, həmçinin qida məhsullarının və onların inqrediyentlərinin, ərzaq xammalının, o cümlədən qablaşdırma materiallarının və kimyəvi maddələrin saxlanması və daşınması üçün mövcud olan qaydalar və onların tələbləri barədə məlumatlandırılıb. Eləcə də müvafiq qulluq və təmizləmə qaydaları, saxlanma və daşınma prosesləri, saxlanma və daşınmaya dair yerli qanunvericiliyin tələbləri və beynəlxalq təcrübə haqqında danışılıb. Eyni zamanda iştirakçılara sanitar gigiyenaya, havalandırmaya, temperatur rejiminə, işıqlandırmaya, çirkab suların axıdılmasına və saxlanma zamanı səthlərə dair tələblər haqqında məlumat verilib. Həşərat və gəmiricilərə qarşı effektiv müdafiənin, həmçinin qida məhsullarının saxlanması və daşınması zamanı müşayiətedici sənədlərin təmin olunması və qida təhlükəsizliyi ilə bağlı saxlanma və daşınmada tətbiq edilməsi vacib olan digər məsələlər də təlim iştirakçılarının nəzərinə çatdırılıb.

Təlim zamanı iştirakçıların sualları cavablandırılıb və tədbirin sonunda onlara sertifikatlar təqdim edilib.