Azərbaycan Qida Təhlükəsizliyi İnstitutunun (AQTİ) Bakı şəhəri və Abşeron rayonlarında fəaliyyət göstərən baytar-həkimləri ilə korrupsiyaya qarşı mübarizəyə həsr olunmuş maarifləndirici görüş keçirilib.

AQTİ-nin İdarə Heyəti sədrinin müavini Sahib Əliyevin, Daxili nəzarət və təhlükəsizlik departamentinin müdiri Cahangir Bayramovun, Heyvanların identifikasiyası və qeydiyyatı departamentinin müdir əvəzi İlkin Əlizadənin, əməkdaşların və baytar-həkimlərinin iştirak etdiyi tədbir “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”nın icrası ilə əlaqədar təşkil olunub.

Görüşdə Daxili nəzarət və təhlükəsizlik departamentinin əməkdaşı Telman Abbasov “Korrupsiyaya qarşı mübarizə üzrə maarifləndirmə” mövzusunda təqdimatla çıxış edib. Təqdimatda korrupsiyaya qarşı mübarizə istiqamətində beynəlxalq və yerli səviyyədə görülən tədbirlər, korrupsiya hüquqpozmalarının növləri və mənfi nəticələri, habelə korrupsiya risklərinin idarə edilməsi və qiymətləndirilməsi ilə bağlı bir sıra mövzulara toxunulub. Daha sonra korrupsiyaya qarşı mübarizə ilə bağlı bir sıra aktual məsələlər müzakirə olunub, iştirakçıların sualları cavablandırılıb.

AQTİ korrupsiyaya qarşı mübarizə ilə bağlı maarifləndirici görüşləri davam etdirəcək.