Azərbaycan Qida Təhlükəsizliyi İnstitutu (AQTİ) ilə Rusiya Federasiyasının Heyvanlar üçün Dərman Preparatlarının və Yemlərin Keyfiyyəti və Standartlaşdırılması üzrə Ümumrusiya Dövlət Mərkəzi arasında qarşılıqlı əməkdaşlığa dair Anlaşma Memorandumu imzalanıb. Memoranduma əsasən, iki qurum arasında baytarlıq və heyvan sağlamlığı sahəsində prioritet istiqamətlər üzrə elmi araşdırmaların, təcrübə mübadiləsinin həyata keçirilməsi nəzərdə tutulub.

Memorandumun əsas məqsədi zoonoz xəstəliklərin başvermə, yayılma səbəblərinin və şəraitinin aydınlaşdırılması, bu xəstəliklərin qarşısının alınması və ləğvi istiqamətində, baytarlıq təyinatlı preparatların düzgün tətbiqi, eləcə də əhalinin və heyvanların sağlamlığı üçün təhlükə yaradan heyvan mənşəli məhsulların və xammalın, yem və yem əlavələri üzrə mühüm əhəmiyyətə malik tədqiqatların aparılması və qarşılıqlı maraq kəsb edən digər problemlərin araşdırılmasından ibarətdir. Bundan başqa, heyvan mənşəli qida məhsullarının keyfiyyət və təhlükəsizliyi üzrə müasir laborator müayinə metodlarına dair həm nəzəri, həm də təcrübi məlumatların mübadiləsi də planlaşdırılır.