HACCP

HACCP nədir?

HACCP (Hazard Analysis and Critical Control Points) – qida istehsalı və emalı proseslərində yarana biləcək təhlükələri əvvəlcədən müəyyən edərək onların qarşısını almağa yönəlmiş, beynəlxalq səviyyədə qəbul olunmuş idarəetmə sistemidir. Sistem, istehsalın hər mərhələsində təhlükə təhlili apararaq qida məhsullarının təhlükəsizliyini təmin etməyə xidmət edir.

Azərbaycan qanunvericiliyində HACCP idarəetmə sisteminə dair tələblər

Azərbaycan Respublikasının “Qida təhlükəsizliyi haqqında” Qanununa əsasən, qida istehsalı və iaşə sahəsində fəaliyyət göstərən müəssisələr qida təhlükəsizliyi üzrə idarəetmə sistemləri, o cümlədən HACCP prinsiplərinə uyğun fəaliyyət qurmalıdırlar. Bu tələblər həm daxili bazarda, həm də ixrac üçün məhsul istehsal edən bütün müəssisələr üçün keçərlidir.

Sahibkarlar üçün HACCP sisteminin faydaları

• Qida təhlükəsizliyinə təminat – istehsalda risklərin vaxtında aşkarlanması və qarşısının alınması;
• İstehlakçı etimadının artırılması – keyfiyyətli və təhlükəsiz məhsul imici formalaşdırır;
• İxrac imkanlarının genişlənməsi – bir çox ölkələrdə HACCP sertifikatı tələb olunur;
• Qanuni tələblərə uyğunluq – dövlət yoxlamalarında pozuntu riskini minimuma endirir;
• Maliyyə itkilərinin azalması – məhsul geri çağırma hallarının qarşısı alınır
• Davamlı keyfiyyətin təminatı – istehsal proseslərinin davamlı olaraq təkmilləşməsi;

Azərbaycan Qida Təhlükəsizliyi İnstitutunun təqdim etdiyi xidmət

Azərbaycan Qida Təhlükəsizliyi İnstitutu müəssisələrdə HACCP sisteminin beynəlxalq və milli tələblərə uyğun şəkildə qurulmasına dair məsləhət və mövcud sistemlərin hərtərəfli qiymətləndirilməsi xidmətləri, həmçinin tətbiq prosesində sahibkara metodiki və məsləhət dəstəyinin göstərilməsi üzrə peşəkar xidmət təqdim edir. Bu xidmət çərçivəsində müəssisələrə sertifikatların verilməsi təmin edilir, beləliklə də istehsal prosesləri yüksək təhlükəsizlik standartlarına uyğunlaşdırılır və istehlakçı etimadı möhkəmləndirilir.